Presentación

Xarabal nace na Cidade de Vigo, en setembro de 1984.

Xarabal dá nome á banda de gaitas fundada por Antón Corral, a carón do mar, no mítico Obradoiro-Escola de gaitas e zanfonas da Universidade Popular de Vigo no ano 1984. Naqueles momentos de incerteza era preciso escoller un nome que simbolizase a situación da música tradicional popular de Galicia e tamén o pulo daqueles gaiteiros, comandados pola ilusión do seu mestre, que pretendían formar unha banda numerosa coa constante da mellora musical.

O mundo da gaita, deostado durante décadas, tentaba rexurdir das súas cinsas da man dun home cun proxecto e un claro obxectivo: a recuperación e a construción de instrumentos tradicionais, a formación de novos músicos e a divulgación da música tradicional. Así xurdiu o nome “xarabal”, co seu significado intimamente ligado ao mar e á linguaxe mariñeira, ao cardume como defensa e á nacenza de novos peixes; de novos músicos que levasen os instrumentos e a música propia ao máis alto nivel.

Antón Corral explicaba acotío que o nome fora escollido, pensando que os músicos dedicados ao folclore galego corrían o perigo de desaparecer, xa que daquela era difícil permanecer no mundo da música tradicional.

Co tempo, a xunción da creatividade, a profesionalidade e a defensa da nosa cultura, postos ao servizo da música tradicional, conformaron o carácter da banda. E nese camiño percorrido ata hoxe continúan resoando na súa filosofía salientables valores aprendidos do seu fundador e mestre, algúns deles téñense convertido mesmo en adaxios:

Antón Corral, artesán e músico, dirixiu a banda dende os seus inicios no ano 1984.

A tradición non consiste só en vivir no pasado, senón en reconstruíla no presente para que permaneza no futuro”

A aprendizaxe dentro da banda debe ser colaborativa”

Máis de trinta músicos, imbuídos destes lemas, constitúen a agrupación actual na que un amplo repertorio, interpretado na voz de varios instrumentos de corte tradicional galega, así como de outras latitudes; como percusións de todo tipo, bouzouqui, acordeón, teclados, baixo eléctrico..; co obxectivo principal de producir novas sonoridades e matices, ofrecen un espectáculo musical de amplo espectro.

Esta actitude incorruptible de respecto á tradición, renovación e apertura a novos sons abrolla nunha senlleira posta en escena onde o dinamismo e a complicidade están sempre presentes.

Baixo a dirección de Marcos Campos, músico de longo percorrido e histórico de Xarabal, Ramón Corral, artesán e percusionista experto e Xabier Abad como subdirector e arreglista ; a banda de gaitas Xarabal persegue un obxectivo musical e interpretativo no que a creatividade, o gusto e o perfeccionamento póñense de manifesto nun repertorio variado, composto de obras tradicionais e de autor.

Así, autores de obras musicais como Nazario González (Moxenas), Ricardo Portela , Enrique Otero, Jose Bandín, Rogelio de Leonardo Bouza etc ou os propios membros, como Ernesto Campos, Carlos Estévez ou Xabier Abad , entre outros, poñen ao servizo da boa música o seu sinal innovador, enxeño e calidade musical.

O escenario vén a ser o hábitat natural de Xarabal; é nel onde ofrece ao público un espectáculo completo no que apreciar con maior precisión o traballo interactivo entre os intérpretes, os solos de experimentados tanxedores, a súa expresividade de cara aos espectadores e tantos detalles individuais e de conxunto con todo o elenco de instrumentos que lles dan vida ás pezas.

Non obstante, Xarabal ten no seu haber longa experiencia en desfiles e ruadas ao abeiro de festivais ou dentro de actos institucionais para os que a banda, dotada dun perfil artístico camaleónico, configúrase e adapta a súa posta en escena á fórmula máis conveniente.