Presentación

Xarabal nace na Cidade de Vigo, en setembro de 1984.

Nos nosos inicios Xarabal comezou sendo unha actividade máis do “Obradoiro escola de instrumentos populares galegos” pertencente á Escola de Artes e Oficios, co obxectivo de crear un punto de encontro dos alumnos de gaita e percusión deste organismo. Rápidamente, e grazas á excepcional calidade dos músicos que formaron o grupo, o colectivo comezou a gañar importancia como ente independente. No ano 2001, independizámonos da Escola de Artes e Oficios creando a Asociación Cultural Xarabal para dar acollida non só a alumnos senón a todo aquel interesado tanto na música como na cultura galega.

A elección do noso nome, Xarabal, corresponde ao seu significado: “agrupación de peixes que se xuntan ante un perigo”. No seu momento simbolizaba o difícil momento polo que estaba a pasar a música popular no noso país; na actualidade, recollemos esta experiencia para brindarlle á música galega novos camiños de expresión. En Xarabal formáronse artistas moi representativos do panorama musical galego como Carlos Núñez, Anxo Pintos, Xosé Manuel Budiño, Anxo Lorenzo, Marcos Campos, Lucía Martínez e un sinfín de nomes de músicos que desenvolven a súa actividade profesional na actualidade, tanto a nivel nacional como internacional, e que tiveron as súas orixes en Xarabal.

Antón Corral, artesán e músico, dirixiu a banda dende os seus inicios no ano 1984.

É un dos persoeiros máis relevantes no ámbito da construcción de gaitas e outros instrumentos tradicionais, e ven facendo dende o ano 1975 unha importante labor de investigación, divulgación e ensino na realización destes instrumentos. Na actualidade o seu neto Ramón Corral dirixe o taller e continúa co legado familiar do selo Corral. Dende o ano 2015, da man do novo director e antigo compoñente Marcos Campos, Xarabal comeza unha nova etapa centrada en recuperar un repertorio principalmente tradicional e conseguir unha perfecta posta en escea.